जनकपुर, २ पुस । प्रदेश नं २ का प्रदेश प्रमुख तिलक परियारसमक्ष सो प्रदेशका मुख्य न्यायाधिवक्ता कार्यालयका आर्थिक वर्ष २०७६÷०७७ को वार्षिक प्रतिवेदन पेश गरिएको छ । सो प्रदेशका मुख्य न्यायाधिवक्ता दीपेन्द्र झाको नेतृत्वको टोलीले आज मुख्य न्यायाधिवक्ताका साथै मातहत कार्यालयको काम कारवाहीको विवरण, त्यसको प्रभावकारिता, प्राप्त गरेका सफलता र कार्यसम्पादनमा आएका चुनौती र सुधारका लागि सुझाव समेटिएका प्रतिवेदन पेश गरिएको प्रदेश प्रमुखको सचिवालयले जनाएको छ ।

प्रदेशको मुख्य न्यायाधिवक्ताको काम, कर्तव्य र अधिकार तथा सेवाका अन्य शर्त सम्बन्धमा व्यवस्था गर्न बनेको ऐन, २०७५ को धारा १३ बमोजिम आर्थिक वर्ष समाप्त भएको तीन महिनाभित्र वार्षिक प्रतिवेदन पेश गर्नुपर्ने व्यवस्था भएबमोजिम मुख्य न्यायाधिवक्ताको कार्यालयले प्रदेश प्रमुखसमक्ष आफ्नो वार्षिक प्रतिवेदन पेश गरेको हो । रासस