कांग्रेस पार्टी कार्यालय सानेपामा बसेको प्रमुख तीन दलको शिर्ष नेताको बैठकले प्रधानमन्त्री केपी शर्मा ओलीले चालेको संसद बिघटनको कदमलाई असंवैधानिक र अलोकतान्त्रिक भन्दै प्रतिवाद गर्ने निर्णय गरेका छन् । आज नेपाली काँग्रेसको केन्द्रीय कार्यालय सानेपामा बसेको नेकपा, काँग्रेस र जनता समाजवादी पार्टीको शिर्ष नेताको बैठकले प्रतिवाद गर्ने निर्णय गरको हो ।

बैठकले संसद् विघटन गर्ने सरकारको अलोकतान्त्रिक र असंवैधानिक कदमका विरुद्धमा साझा प्रतिकार गर्ने निर्णय गरेको नेकपाका प्रवक्ता नारायणकाजी श्रेष्ठले जानकारी दिए । उनले भने,‘सबै दल मिलेर प्रतिवाद गर्ने निर्णय भएको छ ।’ मङ्गलबार तीनवटै दलको आन्तरिक बैठक रहेको र त्यसपछि कसरी प्रतिवाद गर्ने तय हुने बताए ।

बैठकमा काँग्रेसका तर्फबाट सभापति शेरबहादुर देउवा, वरिष्ठ नेता रामचन्द्र पौडेल, उपसभापति विमलेन्द्र निधि, महामन्त्री डा. सशांक कोइरालालगायत सहभागी थिए । नेकपाका तर्फबाट अध्यक्ष पुष्पकमल दाहाल प्रचण्ड, वरिष्ठ नेताहरु झलनाथ खनाल र माधवकुमार नेपाल, प्रवक्ता नारायणकाजी श्रेष्ठलगायत सहभागी थिए । जनता समाजवादी पार्टीका तर्फबाट अध्यक्ष महन्थ ठाकुर, शरदसिंह भण्डारी, जीतेन्द्र सोनल सहभागी थिए ।