एजेन्सी, २६ माघ । स्विडिस स्ट्राइकर ज्लाटन इब्राहिमोभिचले क्लब करिअरमा ५००औं गोल पूरा गरेका छन् ।
‘इटालियन सिरि ए’ अन्तर्गत आइतबार एसी मिलानले क्रोटोनलाई ४-० गोलले पराजित गरेको खेलमा इब्राहिमोभिचले दुई गोल गर्दै क्लब करिअरमा कोशेढुंगा पार गरेका हुन्।

जितसँगै एसी मिलान अंक तालिकाको शीर्ष स्थानमा उक्लियो । उसले २१ खेलबाट ४९ अंक जोड्दा दोस्रो स्थानमा झरेको इन्टर मिलानको ४७ अंक छ ।

सन् १९९९ मा स्विडिस क्लब माल्मोमा डेब्यू गरेको २१ वर्षमा उनले ५०० गोल पूरा गर्न सफल भए । ३९ वर्षीय इब्राहिमोभिचले खेलको ३० मिनेटमा टिमका लागि पहिलो गोल गर्दै ५००औं गोल पूरा गरे। ६४ मिनेटमा उनले टिमका लागि दोस्रो गोल गरेका थिए । यो सिजन उनले ११ लिग खेलमा १४ गोल गरिसकेका छन् ।

आफ्नो करिअरको नवौं क्लबमा खेलिरहेका इब्राहिमोभिचले नेदरल्यान्ड्सको अयाक्स, इटालीकै युभेन्ट्स र इन्टर मिलान, स्पेनको बार्सिलोना, फ्रान्सको पिएसजी, इंग्ल्यान्डको म्यानचेस्टर युनाइटेड र अमेरिकाको एलए ग्यालेक्सीबाट खेलिसकेका छन् ।