शुक्लाफाँटा नगरपालिका–१० झलारीमा रहेको सिर्जनशील बचत तथा ऋण सहकारी संस्था लिमिटेडले आँखा उपचार केन्द्र सञ्चालनमा ल्याएको छ । च्यारिटी हेल्थ फाउण्डेशन कैलालीसँगको साझेदारीमा सहकारीले आँखा उपचार केन्द्र सञ्चालनमा ल्याएको हो । सर्वसाधारणलाई सहज र सुलभरूपमा सेवा प्रदान गर्ने उद्देश्यले आँखा उपचार केन्द्र सञ्चालन गरिएको सहकारीका कार्यकारी प्रमुख मदनराज भट्टले बताउनुभयो ।

“सहकारीको उद्देश्य नाफा आर्जन गर्ने मात्र होइन”, उहाँले भन्नुभयो, “सामाजिक क्षेत्रमा समेत लगानी गर्नुपर्छ । त्यही भावनाले प्रेरित भएर उपचार केन्द्र सञ्चालन गरेका छौँं ।” फाउन्डेशनले उपचार केन्द्रका लागि आवश्यक पर्ने उपकरण, औषधि तथा जनशक्तिको व्यवस्थापन गरेको छ । सहकारीले उपचार केन्द्र सञ्चालनका लागि घरभाडा, विद्युत् र खानेपानीको महसुल तिर्ने सम्झौता गरेको छ । वैशाख महिनादेखि नै सहकारीले उपचार केन्द्र सञ्चालन गर्ने लक्ष्य लिएको भए पनि कोरोनाको सङ्क्रमण बढेपछि गरिएको बन्दाबन्दीका कारण विलम्ब गरी उपचार केन्द्र सञ्चालनमा ल्याएको हो । उपचार केन्द्रबाट हुने आम्दानीबाट आँखा उपचारमा संलग्न प्राविधिकको तलबलगायतको सुविधा उपलब्ध गराइने व्यवस्था गरिएको छ ।

बिरामीको चापअनुसार थप जनशक्ति थप्नुपरेमा सहकारीले सम्पूर्ण खर्च बेहोर्ने गरी राख्ने सहकारीका अध्यक्ष शिवराज भट्टले बताउनुभयो । वैशाख महिनादेखि नै आँखा उपचार केन्द्र सञ्चालन गर्ने सम्झौता गरिएको भए पनि कोरोनाको बढ्दो सङ्क्रमणका कारण सञ्चालनमा विलम्ब भएको उहाँले बताउनुभयो । उपचार केन्द्रमा पुग्ने बिरामीको अबदेखि निरन्तररूपमा उपचार हुने उहाँको भनाइ छ । सहकारीमा आबद्ध १३ हजार ५०० सदस्यलाई आँखा उपचारमा छुट दिने व्यवस्थासमेत गरिएको छ । त्यसका लागि कार्ड बनाउने कार्य भइरहेको सहकारीका पदाधिकारीले बताएका छन् । केन्द्रमा उपचारका लागि आउने बिरामीका लागि रु ५० दर्ता शुल्क निर्धारण गरिएको छ । बाह्य क्षेत्रभन्दा निकै सहुलियत मूल्यमा उपचार केन्द्रबाट बिरामीलाई आवश्यक औषधि उपलब्ध गराइने बताइएको छ ।

नगरपालिका क्षेत्रमा आँखा उपचारको व्यवस्था नहुँदा नगरवासीले टाढाको महेन्द्रनगर र धनगढी पुगेर चर्को शुल्क तिरेर उपचार गराउँदै आएका छन् । झलारी बजारमै आँखा उपचार केन्द्र सञ्चालन भएपछि स्थानीय बासिन्दाले खुशी व्यक्त गरेका छन् । च्यारिटी हेल्थ फाउण्डेशनसँगको सहकार्यमा सहकारीले गत महिना शुक्लाफाँटा–९ मा आँखा शिविरसमेत सञ्चालन गरेको थियो । शिविरमा ३०० भन्दा बढी आँखाका बिरामी लाभान्वित भएका थिए । शिविरमा बिरामीको उपचारसँंगै निःशुल्क चश्मा र औषधि वितरण गरिएको थियो । फाउण्डेशनको सहकार्यमा सहकारीले केही दिनभित्रै शल्यक्रियासहितको बृहत् आँखा शिविर सञ्चालन गर्ने योजनासमेत बनाएको छ । नगरपालिकाका प्रमुख दिलबहादुर ऐरले आँखा उपचार केन्द्रका लागि आवश्यक पर्ने सहयोग नगरपालिकाले उपलब्ध गराउने प्रतिबद्धतासमेत व्यक्त गर्नुभएको छ ।

यो पनि –  कानूनविद् दाहालको मुटुको शल्यक्रिया सम्पन्न

संविधानविद् तथा कानूनविद् काशीराज दाहालको मुटुको शल्यक्रिया सफलतापूर्वक सम्पन्न भएको छ । वरिष्ठ चिकित्सक भगवान् कोइराला र उहाँको समूहले दाहालको मुटुको शल्यक्रिया गरेको हो । कानूनविद् दाहालका दाजु डा रामप्रसाद दाहालका अनुसार उहाँ अहिले खतरामुक्त अवस्थामा हुनुहुन्छ । उहाँलाई आकस्मिकरूपमा मुटुमा समस्या देखिएपछि आइतबार मनमोहन कार्डियोथोरासिक एण्ड भास्कुलर सेन्टर महाराजगञ्जमा उक्त शल्यक्रिया भएको हो । कानूनविद् दाहालका दाजुले रासससँग कुरा गर्दै भन्नुभयो, “ओपन हार्ट सर्जरी गरिएको हो, अहिले सघन उपचारकक्षमा उपचार भइरहेको छ, अहिले खतरामुक्त अवस्थामा हुनुहुन्छ ।”

यो पनि – छोराको उपचारले निरन्तरता पाउने रोमाको विश्वास : “हजुर, सहयोगी हात भेटेकी छु, अब छोराको उपचारले निरन्तरता पाउने आश जागेको छ

महोत्तरी, ६ साउन । “हजुर, सहयोगी हात भेटेकी छु, अब छोराको उपचारले निरन्तरता पाउने आश जागेको छ”, महोत्तरीको बर्दिबास नगरपालिका–६ किसाननगरकी ४० वर्षीया रोमा कार्कीले गहभरि आँशु पार्दै भन्नुभयो । भारतको दिल्लीस्थित अखिल भारतीय आयुर्विज्ञान संस्थान (एम्स) मा मस्तिष्कको नसासम्बन्धी उपचार भइराखेका १८ वर्षीय छोरा गौतम कार्कीको उपचारका लागि बर्दिबासमा सहयोगस्वरुप रु एक लाख ६७ हजार ४०० नगद पाएपछि बनीबुतो गरेर जीवनयापन गरिरहेकी रोमामा यो विश्वास पलाएको हो ।

बर्दिबासका सामाजिक सङ्घसंस्था र विभिन्न व्यक्तिले गौतमको उपचारका लागि सहयोग सङ्कलन गरेर परिवारजनलाई बुझाएका हुन् । रकम बुझेका आफन्तले सो रकम रोमालाई हस्तान्तरण गरेपछि उहाँलाई अब रकमकै अभावमा उपचार नरोकिने विश्वास बढेको हो । कक्षा–१२ मा पढ्दापढ्दै दुई वर्षअघि गौतमको टाउको दुख्ने, रिङ्गटा लाग्ने र ढल्ने लक्षण देखिएपछि उपचारका लागि काठमाडौँ पु¥याइएको थियो । चिकित्सकले मस्तिष्कमा नसासम्बन्धी समस्या भएको ठहरपछि गौतमलाई आफन्तले दिल्ली पु¥याएका हुन् । उपचारका क्रममा रकम अभावले आवश्यक औषधिको पनि चाँजो मिलाउन नसक्दा निरास बनेकी रोमा अब उपचारले निरन्तरता पाउने बताउनुहुन्छ ।

“दुई दिनअघि प्राप्त रकम दिल्ली पठाइयो, अब छोरो फिर्छ भन्ने लागेको छ”, रोमाले घरमै पुगेका सञ्चारकर्मीसँग भन्नुभयो, “म दुःखीको सहारा बन्नेलाई भगवान्ले हेर्नेछन् ।” दिल्लीमा छोराको उपचार खर्चकै अभावमा अघि बढ्न नसकेका बेला बर्दिबासमा प्राप्त सहयोगले आशाभरोसा बढाएको रोमाको भनाइ छ । “छोरा दुई वर्षदेखि बिरामी छ, म बनीबुतो (मजदुरी) गरेर जीवन धान्दै छु”, रोमाले सहयोगी मनहरुप्रति आभार व्यक्त गर्दै भन्नुभयो, “ठाउँमा छ, अब खर्च पनि अलिकता जुट्यो, निको हुने आश जागेको छ ।” आपद् खेपिरहेकी आफूप्रति सद्भाव र स्नेह राख्ने सबै सहयोगीप्रति रोमाले आभार व्यक्त गर्नुभएको छ ।

पति मीनबहादुर कार्कीको निधनपछि बनीबुतो गरेर दुई छोरा हुर्काएकी रोमाले गत वर्ष ठूलो बज्रपात खेप्नुभयो । कान्छो छोरा सविन कार्कीको रक्त क्यान्सरले मृत्यु भयो । जेठो छोरा नसासम्बन्धी असाध्य रोगले ग्रस्त भएर उपचार निरन्तर बढाउन रकम नभएपछि गाउँघरमा रोइकराई गरिरहेकी रोमालाई बर्दिबासका सामाजिक सङ्घसंस्थाले समन्वय गरेर सङ्कलन भएको रकम पठाएका हुन् ।

“सामाजिक सञ्जाल (फेसबुक) मा गौतमको अवस्थाबारे आएका कुरा पढेपछि मन थाम्न सकिएन”, नेपाल रेडक्रस सोसाइटी बर्दिबास उपशाखाका कोषाध्यक्ष रेवन्त कार्की ‘सुदीप’ले भन्नुभयो, “तुरुन्तै सम्पर्क हुनसक्ने साथीहरुलाई खबर गरेँ, सामूहिक प्रयत्नबाट लगत्तै सङ्कलन भएको रकम परिवारजनलाई हस्तान्तरण ग¥यौँ ।” यो विषय थाहा पाएर तुरुन्तै गौतमको उपचारमा सहयोग पुगोस् भन्ने् हेतुले सङ्कलित रकम आफन्तलाई हस्तान्तरण गरिएको सुदीपले बताउनुभयो ।

गौतमको उपचार सहयोगार्थ बर्दिबासस्थित बर्दिबास हेल्प फाउण्डेशनले रु ५१ हजार, होटल विनायकले रु २१ हजार, प्रल्हाद क्षत्रीले रु १५ हजार, होटल तथा पर्यटन व्यवसायी सङ्घ महोत्तरी, बर्दिबास उद्योग वाणिज्य सङ्घ, नेवाः सङ्घ, लुम्बिनी हार्डवेयर, रोटरी क्लब अफ बर्दिबास र उद्यमी कुमार भण्डारीले रु ११/११ हजार सहयोग गरेका छन् । त्यसैगरी रेडक्रस बर्दिबास उपशाखाका पदाधिकारी, होटल गुञ्ज र दीपक ट्रेडर्सले रु पाँच हजार १०० का दरले सहयोग गरेका मुख्य सहयोग सङ्कलन समन्वयकर्ता सुदीपले जानकारी दिनुभयो ।

सहयोस्वरुप प्राप्त रकम तत्काल पठाइएको र गौतमको उपचारका लागि थप गर्न सकिने सहयोगका लागि आपसी समन्वय बढाइने सुदीपको भनाइ छ । सुदीपले अत्यन्त गरिबी र वियोग खेपिरहेकी रोमाका छोराको उपचारमा सहयोग बढाउन सबै मनकारीसँग अपिल पनि गर्नुभएको छ । अप्ठ्यारो बेला पाएको सहयोगले रोमा विभोर हुँदै भन्नुहुन्छ, “हजुरहरू सबैको आशिक लागोस्, उपचारपछि ठिक भएको छोरा हजुरहरुलाई भेटाउन ल्याउने छु । गौतमको उपचारमा खर्चको अभाव हुन नदिन बर्दिबासमा अन्य व्यक्ति र सामाजिक सङ्घसंस्थाले पनि चासो देखाएका छन् । रासस