काठमाडौं, २६ साउन । प्रतिनिधिसभाको आजको बैठकमा नेकपा एमालेका अध्यक्ष तथा संसदीय दलका नेता केपी शर्मा ओलीले सम्बोधन गरेका छन । सत्तापक्षीय गबन्धनले ल्याएको साझा न्यूनतम कार्यक्रमका विषयमा ओलीले कडा टिप्पणी गरेका छन । उनले लिम्पियाधुरा लिपुलेक, सिमा विवाद र एमसीसी बारे कार्यक्रममा केही उल्लेख नगरेको भन्दै कडा टिप्पणी गरेका छन् ।

उनले सत्ताक्षीय गठबन्धनले ल्याएको कार्यक्रममा खुलस्त ठोस कुरा नगरेर साना र मसिना कुरामात्रै राखिएको आरोप समेत लगाएका छन । साझा न्यूनतम कार्यक्रममा भ्रस्टचारीलाई कारवाही गर्ने कुरा लेखिएकोमा ओलीले क्यान्टोनमेन्टको भ्रस्टाचारको पनि अनुसन्धान हुनेमा आशंका व्यक्त गरेका छन । पुर्वप्रधानमन्त्री तथा नेकपा एमालेका अध्यक्ष तथा संसदीय दलका नेता केपी शर्मा ओलीले प्रतिनिधि सभामा गरेको सम्बोधन यहाँबाट हेर्नुहोस :

यो पनि – प्रतिनिधिसभा बैठक शून्य समय : कोरोनाको खोपदेखि विपत्तिमा परेकालाई राहत

काठमाडौँ, २६ साउन (रासस) : प्रतिनिधिसभाको आजको बैठकमा कोरोना महामारीका कारण समस्यामा परेका नेपाली जनतालाई तत्काल खोपको व्यवस्था गर्न सरकारको ध्यानाकर्षण गराइएको छ । सरकारको महत्वपूर्ण कार्यभारका रूपमा खोप उपलब्ध गराउनु रहेको भन्दै सांसदहरुले सो कार्यका लागि स्पष्ट कार्ययोजनाका साथ अगाडि बढ्न अनुरोध गर्नुभयो ।

उहाँहरूले सबै नेपालीले समयमै खोप पाउने सुनिश्चितता गरी स्थगित भएका परीक्षा सञ्चालन गर्न आग्रह गर्नुभयो । बैठकको शून्य समयमा बोल्ने सांसदहरुले बाढी पहिरोका कारण समस्यामा परेका नागरिकको उद्धार तथा राहत प्रदान गरी विपत्तिमा परेका बस्तीलाई तत्काल स्थानान्तरण गर्न माग गर्नुभयो ।

सांसद शक्तिबहादुर बस्नेतले कोरोनाको तेस्रो लहर आउने सन्त्रास देखिएको सन्दर्भमा सरकारले के कस्तो प्रतिकार्यको योजना अगाडि सारेको छ भन्ने बारेमा सरकारको स्पष्ट धारणा सार्वजनिक गर्न माग गर्नुभयो । सांसद विन्दा पाण्डेले अनौपचारिक क्षेत्रमा कार्यरत श्रमिकको पञ्जीकरण गर्न र विदेशमा रहेका नेपालीलाई कार्यस्थलबाटै मतदानको व्यवस्था गर्न सरकारको ध्यानाकर्षण गराउनुभयो । प्राकृतिक विपत्तिमा परेको मेलम्ची तथा हेलम्बु क्षेत्रमा गाँस, बास र कपासको व्यवस्था गर्न आग्रह गर्दै सांसद शेरबहादुर तामाङले सो क्षेत्रमा सरकारको उपस्थिति हुनुपर्ने माग गर्नुभयो ।

सांसदहरु लालकाजी गुरुङ, लालप्रसाद साँवा लिम्बू, लालबहादुर थापा, विद्या भट्टराई, बिन्दा पाण्डे, विष्णु शर्मा, बोधमायाकुमारी यादव, शक्तिबहादुर बस्नेत, शशी श्रेष्ठ, शान्ता चौधरी, शान्तिमाया तामाङ पाख्रिन, शेरबहादुर तामाङ, श्याम श्रेष्ठ, सत्य पहाडी, समिना हुसेन, हरि अधिकारी, हितबहादुर तामाङले कोरोना कहर, प्राकृतिक विपत्तिमा परेका नागरिकलाई राहत प्रदान गर्न, सीमा समस्या समाधान गर्न आग्रह गर्नुभयो ।