अनुहार ढाक्नेगरी मासुको लुर्को फैलिएर गम्भीर स्वास्थ्य समस्या भोगिरहनुभएकी झापाको मेचीनगर–८ की ३५ वर्षीया विष्णुमाया मगरको दाताको सहयोगमा शल्यक्रिया भएको छ । काठमाडौँको सुषमा कोइराला अस्पतालमा उहाँको शल्यक्रिया गरेर अनुहार ढाक्ने गरी फैलिएको मासु फालिएको हो । विपन्न परिवारकी उहाँ अर्थाभावले वर्षौँदेखि अनुहारमा मासुको डल्लो बोकेर कष्ट व्यहोर्दै आउनुभएको समाचार राससमा प्रकाशित भएको थियो । उहाँको उपचारका लागि सुरुदेखि पहल गर्नुभएकी स्थानीयवासी निर्मला भण्डारीका अनुसार दाता उज्ज्वलविक्रम शाहको सहयोग र सामाजिक अभियानकर्मी नरेश मोहराको पहलमा उहाँलाई केही दिनअघि काठमाडौँको साँखुस्थित सुषमा कोइराला अस्पतालमा उपचारका लागि भर्ना गरिएको थियो ।

पहिलो चरणको शल्यक्रिया सम्पन्न भएको र तीन महिनापछि अर्को चरणको शल्यक्रिया गर्नुपर्ने बताइएको भण्डारीले बताउनुभयो । पहिलो शल्यक्रियामा उहाँको अनुहार छोप्ने गरी फैलिएको मासुको लुर्को हटाइएको छ । चिकित्सकहरुले उपचार गर्न अरु ढिला भएको भए मासुको लुर्को च्यातिएर क्यान्सर फैलिने त्रास भएको बताउनुभएको थियो । उहाँको उपचारमा विभिन्न दाताले समेत सहयोग प्रदान गरेका थिए ।

उहाँको अनुहारमा मासु पलाउन थालेपछि रोजगारीका लागि काममा जानसमेत कठिनाइ भएको थियो । उहाँलाई अपाङ्गता प्रमाणपत्र दिलाउन पहल गर्दा नसकिएपछि भरणपोषणका लागि समेत दाता खोज्नुपर्ने अवस्था आएको थियो ।

यो पनि – विष्णुमाया मगरको पिडा: अनुहारमा मासुको डल्लो पलाएर अनुहारै छोपियो, उपचार पाइएन

निधारमा निस्किएको मासुको डल्लो अस्वभाविक रुपमा बढ्दै जाँदा मेचीनगर नगरपालिका– ८ की ३५ वर्षीया विष्णुमाया मगरको अनुहार नै छोपिन थालेको छ । गीरबीका कारण उपचार गर्न नसकेर अनुहारभरि पलाएको मासुको डल्लो बोकेर भौतारिरहनुभएका विष्णुमायाको समस्या दिन प्रतिदिन बढ्दै गएको छ । निधारमा रहेको मासुको डल्लो बढ्दै गएर दुबै आँखा छोपिन लाग्दा उहाँलाई हेर्नसमेत समस्या भइरहेको छ । मासुको डल्लो झन–झन बढ्दै जाँदा अब के गर्ने भन्ने अन्यौलताले मगर परिवार चिन्तित छन् ।

“उपचार गर्न जाऔं, पैसा छैन । उपचार नगरौं, अनुहारमा अस्वभाविक रुपमा मासुको डल्लो बढ्दै जाँदा खानपिउन गर्न नै समस्या भइसक्यो,” उहाँले रासससँग भन्नुभयो । मासुको डल्लो बढेर नाक र मुख छोपिइसकेको र आँखा हेर्नसमेत समस्या हुँदै गएको उहाँले बताउनुभयो ।आफ्नो घर नभएपछि काकाकाकीको घरमा बस्दै आउनु भएका उहाँ आर्थिक अभावका कारण उपचारका लागि अस्पताल जान नसकिएको र पीडा सहेर बस्नु परेको दुःखेसो पोख्नुभयो । उहाँको अनुहारमा के रोगका कारण मासु पलाएको भन्ने थाहा हुन सकेको छैन । काकाकाकीको आर्थिक अवस्था समेत कमजोर छ । बाल्यकालदेखि नै अनुहारमा साना गाठागुठी देखिएको र हाल अस्वभाविक रुपमा बढ्दै जाँदा समस्या उत्पन्न भएको उहाँको भनाइ छ ।

काम गर्न नसक्ने अवस्था भएकाले जीविकाका लागि सहयोग माग्न उहाँ मङ्गलबार मेचीनगर नगरपालिकाकाप्रमुख बिमल आचार्यलाई भेट्न कार्यालय पुग्नुभएको थियो । आचार्यले नगरपालिकाले केही सहयोग गर्ने आश्वासन दिनुभयो । नगरका प्रमुखलाई भेटाउन सहयोग पु¥याउनु भएकी स्थानीय सामाजिक कार्यकर्ता निर्मला भण्डारीले शारीरिक अशक्त भएको हुँदा विष्णुमायालाई अपाङ्गता परिचयपत्र बनाउन सकेमा सामाजिक भत्ता पाएर जीविका चलाउन सहज हुने बताउनुभयो ।अपाङ्गता प्रमाणपत्रका लागि पहल गरिदिन उहाँले नगरपालिकाका प्रमुख आचार्यलाई अनुरोध गर्नुभयो । उपचारका लागि निःशुल्क व्यवस्था हुनसके नयाँ जीवन पाउने उहाँले बताउनुभयो ।

दृष्टिविहीन अनलाइन शिक्षाबाट वञ्चित

झापामा रहेका २६ जना दृष्टिविहीन विद्यार्थी इन्टरनेट र डिभाइस खरिद गर्न नसक्दा अनलाइन शिक्षाबाट वञ्चित भएका छन् ।संवाद समूहले मङ्गलबार विर्तामोडमा आयोजना गरेको एक कार्यक्रममा नेत्रहीन सङ्घ झापाका उपाध्यक्ष चन्द्रप्रसाद भट्टराईले २६ जना दृष्टिविहीन विद्यार्थी अनलाइन शिक्षाबाट वञ्चित भएको, खाद्यान्न, सेतो छडी, ह्वील चियर, श्रवणयन्त्र, लत्ताकपडा, जुत्तालगायतको अभाव रहेको बताउनुभयो ।

जिल्लामा हालसम्म तीन जना दृष्टिविहीन कोभिड– १९ बाट सङ्क्रमित भइसकेको र अपाङ्गता भएकाहरुले मनोसामाजिक परामर्श नपाएको नेत्रहीन सङ्घ झापाका सचिव भोजकुमार तामाङले बताउनुभयो । सडकपेटीमा गीत सुनाएर जीवन निर्वाह गर्दै आएका दृष्टिविहीन र अपाङ्गता भएकाले उत्पादन गरेको फिनेल, हार्पिक, अगरबत्ती, कुचोजस्ता घरायसी सामग्री निषेधाज्ञाका कारण बिक्री गर्न नपाउँदा हाल भोकभोकैपर्ने अवस्था आएको कनकाई अपाङ्गता समावेशी संस्थाकी अध्यक्ष सिर्जना बरालले बताउनुभयो ।