नेपालको परराष्ट्रमन्त्रीमा डा नारायण खड्का नियुक्त हुनुभएकामा भारतका विदेशमन्त्री एस जयशङ्करले बधाई ज्ञापन गर्नुभएको छ । सामाजिक सञ्जालमार्फत भारतका विदेशमन्त्रीले खड्कालाई बधाई दिँदै उहाँसँग सहकार्य गर्न आफू प्रतीक्षारत रहेको बताउनुभएको छ । यसैबीच परराष्ट्रमन्त्री खड्का र भारतका विदेशमन्त्रीबीच न्युयोर्कमा भेटवार्ता हुने सम्भावना प्रबल रहेको एक भारतीय कूटनीतिज्ञले न्युयोर्कबाट राससलाई बताउनुभयो ।

संयुक्त राष्ट्रसङ्घको ७६औँ महासभामा भाग लिने सिलसिलामा भारतका विदेशमन्त्री हाल न्यूयोर्कमा हुनुहुन्छ भने परराष्ट्रमन्त्री खड्का सोही सिलसिलामा आज अपराह्न त्यहाँ पुग्दै हुनुहुन्छ । दक्षिण एसियाली क्षेत्रीय सहयोग सङ्गठन (सार्क) को वर्तमान अध्यक्ष नेपालले महासभाका सन्दर्भमा आयोजना गर्दै आएको सार्क मुलुकका परराष्ट्रमन्त्रीको अनौपचारिक बैठक यसपटक अफगानिस्तानको बदलिँदो राजनीतिक परिदृश्यलाई दृष्टिगत गरी स्थगन गरिएका बेला हुनलागेको नेपाल र भारतका विदेशमन्त्रीको भेटवार्तालाई महत्वपूर्ण मानिएको छ ।

यो पनि – परराष्ट्रमन्त्री खड्काद्वारा शपथ

काठमाडौँ, ६ असोज (रासस) : राष्ट्रपति विद्यादेवी भण्डारीले नवनियुक्त परराष्ट्रमन्त्री डा नारायण खड्कालाई आज पद तथा गोपनीयताको शपथ दिलाउनुभएको छ । राष्ट्रपति भवन शीतल निवासमा आयोजित समारोहमा राष्ट्रपति भण्डारीसमक्ष मन्त्री खड्काले शपथ लिनुभएको हो ।

समारोहमा प्रधानमन्त्री शेरबहादुर देउवा, सभामखु अग्निप्रसाद सापकोटा र राष्ट्रियसभाका अध्यक्ष गणेशप्रसाद तिमल्सिना उपस्थित हुनुहन्थ्यो । मन्त्री खड्कालाई प्रधानमन्त्रीको सिफारिसमा राष्ट्रपतिले आजै परराष्ट्रमन्त्रीमा नियुक्त गर्नुभएको हो ।

यो पनि – म्याद गुज्रिएको चियापत्तीबारे थप अनुसन्धान सुरु

–पुरुषोत्तम सुवेदी, वीरगन्ज, ६ असोज (रासस) : वाग्मती प्रदेशको राजधानी हेटौँडास्थित बहुराष्ट्रिय कम्पनी युनिलिभर नेपाल लिमिटेडलाई खाद्य प्रविधि तथा गुण नियन्त्रण कार्यालयले थप अनुसन्धान प्रक्रिया अघि बढाएको छ ।

यस अगावै उद्योग परिषरमा म्याद गुज्रेको चियापत्ती बरामद भएको विषयलाई लिएर खाद्य तथा गुण नियन्त्रण विभागले थप अनुसन्धान गर्न निर्देशन दिएपछि सोका लागि एकजना खाद्य निरीक्षकलाई अनुसन्धान अधिकारीका रुपमा तोकेर थप अनुसन्धान प्रक्रिया अघि बढाइएको हो ।

यद्यपि तोकिएको अनुसन्धान अधिकारीको नाम गोप्य राखिएको छ । अनुसन्धानका क्रममा कुनै दबाब र प्रभाव नपरोस् भन्ने उद्देश्यले अनुसन्धान अधिकारीको नाम सार्वजनिक नगरिएको खाद्य प्रविधि तथा गुण नियन्त्रण कार्यालय, मकवानपुरका प्रमुख सोमकान्त रिजालले जानकारी दिनुभयो । यस अगावै स्थानीय प्रशासनको नेतृत्वमा उद्योग परिसरमा छापा मारेर म्याद गुज्रिएको चियापत्ती बरामद गरेपछि त्यसको लेभलबारे थप अनुसन्धानका लागि खाद्य तथा गुण नियन्त्रण विभागमा जाँच गर्नका लागि पठाइएको थियो ।

विसं २०१९ मा उत्पादित चियापत्ती सन् २०२० को जुन महिनाभित्र प्रयोग गरिसक्नुपर्ने जनाएको छ । यद्यपि फेला परिएको चियापत्ती म्याद गुज्रिएको डेढ वर्ष भइसकेको चिया पुनः रिप्याकेजिङ गर्नु उपभोक्तामाथिको ठगी रहेको भन्दै सिलबन्दी गरिएको थियो । नेपाली आम जनताको भान्सामा बहुराष्ट्रिय कम्पनीको विश्वासका साथ प्रयोग गर्दै आएकामा यसले उद्योगको उत्पादनमाथि नै प्रश्न उठेको र नेपाली उपभोक्तालाई ठगी गरिरहेको उपभोक्ताकर्मीहरुको भनाइ छ ।

बहुराष्ट्रिय कम्पनी युनिलिभरमा ३२ टन म्याद गुज्रिएको चियापत्ती बरामद गरेपछि स्थानीय प्रशासनले यही भदौ १७ गते सिल गरिएको थियो । हेटौँडा–३, बसामाडीमा रहेको बहुराष्ट्रिय कम्पनी युनिलिभर नेपाल लिमिटेडको चियापत्ती प्लान्टमा स्थानीय प्रशासनले सिल गरेको थियो । युनिलिभरमा ३२ टन चियापत्तीमा सिल गरिए पनि अरूसमेत गरेर म्याद गुज्रिएको तीन हजार बोरा चियापत्ती रहेको छ ।

भारतबाट आयात गरिएको म्याद गुज्रिएको (डेट एक्स्पायर) चियापत्तीलाई रिप्याकेजिङ गरी रेड लेबल चियाको ब्रान्डमा बजार पठाउने गरेको फेला पारिएसँगै सिल गरिएको थियो । विशेष सूचनाका आधारमा स्थानीय प्रशासन, खाद्य प्रविधि तथा गुण नियन्त्रण कार्यालय, उपभोक्ता हित संरक्षण मञ्चसहितको संयुक्त अनुगमन टोलीले उद्योग परिसरमा रहेको चियापत्ती प्लान्टमा अनुगमन गरेको बताइएको छ ।

अनुगमनका क्रममा रिप्याकेजिङ गर्न तयार रहेको ३५ केजी तौलका ९२० बोरा (३२ टन २०० केजी) अन्य कम्पनीका मिश्रित चियापत्ती तीन हजार बोराभन्दा बढी चियापत्ती फेला पारिएको थियो । युनिलिभरमा खाद्य प्रविधि तथा गुण नियन्त्रण कार्यालय, हेटौँडाका प्रमुख रिजालसहितको टोलीले चियापत्ती उत्पादन गर्ने उद्योगमा सिल गरिएको थियो ।

खाद्य प्रविधि तथा गुण नियन्त्रण कार्यालयले लेबल नभएको, म्याद गुज्रेको सामग्री उपभोक्तालाई बेच्नका लागि परेको अभियोगमा मुद्दा अघि बढाइएको छ । खाद्य प्रविधि तथा गुण नियन्त्रण विभागले म्याद गुज्रिएका, लेबल नभएका खाद्य सामग्री तत्काल नष्ट गर्न २०७६ साल कात्तिक १७ गते मातहत कार्यालयलाई निर्देशन दिएको छ । यसअघि मकवानपुरमा हुने गरेको संयुक्त अनुगमनका क्रममा म्याद गुज्रिएको सामग्री सोझै नष्ट गर्ने गरेको थियो ।

युनिलिभरका म्याद गुज्रिएको चियापत्ती नष्ट नगरी परीक्षणका लागि विभाग पठाउनुले यो विषयलाई कमजोर बनाउन लागेको उपभोक्ताकर्मीको आरोप रहेको छ । यस विषयमा खाद्य प्रविधि तथा गुण नियन्त्रण कार्यालय, मकवानपुरले मुद्दालाई थप बलियो बनाउन परीक्षण गर्न लागिएको दाबी गरेको छ ।