भरतपुर अस्पतालमा बिरामीको चापबढेसँगै बहिरङ्ग सेवाको समय बढाएको छ । अस्पतालले आजैदेखि सेवा समय बढाएको हो ।
अस्पतालका निमित्त प्रमुख मेडिकल सुपरिटेण्डेण्ट प्राडा कृष्णप्रसाद पौडेलका अनुसार बिहान ८ बजेदेखि टिकट खुल्ला हुनेछ भने ८ः३० बजेबाट परीक्षण सुरु गरिने छ । बिरामीले टिकट काटिसकेपछि लामो समयसम्म कुर्न नपरोस् भनेर तीन छुुट्टा–छुट्टै कक्षबाट यो सेवा सुरु गरिएको छ । यसअघि सञ्चालित बहिरग सेवा बिहान ९ बजेबाट नियमित नै सञ्चालन गरिने र यो सेवा सुरु गरेसँगै अस्पतालमा लामो समयसम्म पालो पर्खनुपर्ने अवस्था अन्त्य हुने उहाँको भनाइ थियो ।

यो सेवामा मेडिकल जनरलिष्ट र मेडिकल अफिसरले बिरामीको परीक्षण गर्ने छन् । आवश्यकतानुसार थप परीक्षण गर्नुपर्ने भए विशेषज्ञकहाँ पठाउने व्यवस्था गरिएको मेडिकल सुपरिटेण्डेण्ट पौडेलले जानकारी दिनुभयो । टिकट काट्न र ओपिडीमा परीक्षण गर्न लामो समय पर्खनुपर्ने गुनासो आएकाले अस्पतालले सेवा विस्तार गरेको हो ।

अस्पतालले छिट्टै अनलाइनबाट बहिरङ्ग सेवाको टिकट काट्ने व्यवस्था गर्ने जनाइएको छ । कोरोनाको सङ्क्रमण घटेसँगै अन्य बिरामीको चाप बढ्दै गएको छ । सरकारी यस अस्पतालमा चितवनसहित छिमेकी १९ भन्दा बढी जिल्लाबाट बिरामी उपचारका लागि आउने गरेका छन् । प्रसूति सेवाका लागि काठमाडौँको प्रसूतिगृह पछि सबैभन्दा धेरै प्रसूति सेवा दिनेमा यही अस्पताल पर्दछ ।

यो पनि- कोरोनापछिको पढाईमा विद्यार्थी उत्साहित

कोरोनाको कहरले बन्द रहेका विद्यालय खुल्न थालेपछि विद्यार्थी नियमित विद्यालय जान थालेका छन् । लामो समयसम्म विद्यालय जान नपाएर घरमै बस्न बाध्य विद्यार्थी झोला बोकेर स्कुल पोशाकमा विद्यालय जान पाउँदा धेरै खुसी देखिएका छन् ।  विद्यालयमा स्वयम् उपस्थित भएर पढ्न पाउँदा धेरै छिटो बुझन सकिने रामपुर आवासीय अङ्ग्रेजी बोर्डिङ स्कुल कक्षा १० मा अध्ययनरत सुस्मा सिग्देल बताउनुहुन्छ । उहाँ भन्नुहुन्छ, “विद्यालय बन्द हुँदा घरमा बसेर अनलाइन कक्षा पनि पढियो, अनलाइन कक्षाको तुलनामा भौतिकरुपमा विद्यालयमा नै उपस्थित भएर पढ्दा नै छिटो बुझ्न सकिने, धेरै कुरा सिकिने, विद्यालय जान पाउँदा रमाइलो लागेको छ ।”

बिहान १० बजेदेखि दिउँसो २ बजेसम्म खाजा खाने समय कटाएर नियमित पढाउन थालिएको रामतुलसी माविका प्रधानाध्यापक बालकृष्ण लम्साल बताउनुहुन्छ । “खाजा खाने समयलाई शिक्षण कार्यमा सदुपयोग गरी दिउँसो २ बजेसम्म नियमित कक्षा चलाइएको छ, विद्यार्थी विद्यालयमा आउन पाउँदा असाध्यै खुशी भएका छन्”, प्रअ लम्सालले भन्नुभयो ।

केही पालिकाका विद्यालयले भने दसँैअघि परीक्षा सक्ने गरी प्रथम त्रैमासिक परीक्षा सञ्चालन गरिरहेका छन् । कोरोनाको कहर कम हुँदै गएपछि स्वास्थ्य सुरक्षाका मापदण्ड अपनाएर गत भदौ २७ गतेदेखि नै रामपुर नगरपालिकाका सबै विद्यालयमा नियमित पठनपाठन भइरहेको नगर शिक्षा अधिकृत विकल काफ्ले बताउनुहुन्छ ।
“नगरपालिकाभित्रका सबै विद्यालयमा धमाधम पढाई भइरहेको छ, केही विद्यालयमा प्रथम त्रैमासिक परीक्षा पनि सञ्चालन भएका छन्, नियमितरुपमा विद्यालय खुल्न थालेपछि विद्यार्थी पनि उत्सुक छन्”, काफ्लेले भन्नुभयो ।

धेरै समयपछि पढाइ भए तापनि शिक्षण सिकाइ कार्यप्रति विद्यार्थी उत्सुक रहेको पूर्वखोला गाउँपालिका–३ अर्खडाँडास्थित जनउज्ज्वल आधारभूत विद्यालयका शिक्षक डिल्लीराज पङ्गेनीले बताउनुभयो । माथागढी गाउँपालिकाका सबै विद्यालयमा अहिले धमाधम पठनपाठन चलिरहेको छ । स्वास्थ्य सुरक्षा अपनाउँदै गत भदौ २७ देखि नै विद्यालय सञ्चालन भइरहेको गाउँपालिकाका अध्यक्ष सन्तोष थापा मगरले बताउनुभयो ।

यस्तै रम्भा गाउँपालिकाले कोरोनाको कहर कम हुन थालेपछि सबै विद्यालयमा पठनपाठन सञ्चालन कार्य अगाडि बढाएको छ । यहाँ विद्यालय सुरु गर्दाको बखत धेरै विद्यार्थी भएका विद्यालयले केही दिन आलोपालो गरी कक्षा चलाइयो, अहिले सबै विद्यालयमा नियमितरुपमा पठनपाठन कार्य चलिरहेको रम्भा गाउँपालिकाका अध्यक्ष विष्णुप्रसाद भण्डारीले बताउनुभयो ।

पाल्पाका सबै पालिकामा स्वास्थ्य सुरक्षा सामग्री अपनाएर सावधानीपूर्वक पठनपाठन कार्य चलिरहेको शिक्षा विकास समन्वय तथा इकाइ कार्यालय पाल्पाका प्रमुख रमेशराज पौडेल बताउनुहुन्छ । केही पालिकाका विद्यालयले बन्दाबन्दीका समयमा इन्टरनेटका माध्यमबाट कक्षा सञ्चालन गरेका थिए । इन्टरनेटको पहुँच नभएका विद्यार्थीले बन्दाबन्दीमा घरमै खेलेर समय बिताउन बाध्य थिए ।

अहिले भने विद्यालय खुलेपछि नियमित स्कुल पोशाकमा कापी कलम बोकेर विद्यालय जाने गरेको अभिभावक सुस्मा भट्टराईले बताउनुभयो । मास्क, स्यानिटाइजरको अनिवार्य प्रयोग गरेर विद्यार्थी अनिवार्यरुपमा विद्यालय जान थालेका छन् ।