शङ्खमुल फुटसल क्लब पोखरामा जारी ‘ए डिभिजन’ राष्ट्रिय फुटसल लिगको फाइनलमा प्रवेश गरको छ । पोखरा रङ्गशालास्थित बहुउद्देश्यीय कभर्डहलमा आज भएको खेलमा ‘द राइजिङ’ क्लब धरानमाथि ४–३ गोल अन्तरको जित निकाल्दै काठमाडौँको शङ्खमुल क्लब फाइनलमा प्रवेश गरेको हो ।विजेता शङ्खमुलले शुक्रबार घरेलु टोली स्पोर्टस् क्यासलसँग उपाधिका लागि प्रतिस्पर्धा गर्नेछ । अत्यन्त रोचक र प्रतिस्पर्धात्मक खेलमा शङ्खमुललाई उपाधि नजिक पु¥याउनका लागि मणि लामा नायक बन्नुभयो ।

उहाँ एक्लैले चार गोल गर्न सफल हुनुभएको थियो । शङ्खमुलले पहिलो हाफमा २–१ को अग्रता बनाएको थियो । खेलको सुरुआतमै मणिले गोल गर्दै अग्रता दिलाउनुभयो । खेलको ११ औं मिनेटमा राइजिङका विसन श्रेष्ठले बराबरी गोल फर्काएपनि १५ औं मिनेटमा मणिले दोस्रो गोल गर्नुभयो ।शङ्खमुलले दोस्रो हाफमा भने लय गुमाउन पुगेको थियो । २४औँ मिनेटमा हेमन्त थापा मगरले गोल गर्दै खेल बराबरीमा ल्याउनुभयो भने विशनले २८औँ मिनेटमा व्यक्तिगत दोस्रो गोल गर्दै राइजिङलाई अग्रता दिलाउनुभएको थियो । खेलको ४० औं मिनेटमा लामाले ह्याट्रिक पूरा गर्दै शङ्खमुललाई हारबाट जोगाउनुभयो ।

त्यसपछि खेल अतिरिक्त समयमा धकेलिएको थियो । थप गरिएको समयको तेस्रो मिनेटमा लामाले व्यक्तिगत चौथो गोल गर्दै टिम उपाधि नजिक पु¥याउन सफल हुनुभयो । लामा खेलको ‘म्यान अफ दी म्याच’ समेत घोषित हुनुभएको थियो ।शङ्खमुलले बुधबार ‘एलिमेटर’मा घरेलु टोली सविन मेमोरियललाई हराएर राइजिङसँगको भेट पक्का गरेको थियो । अखिल नेपाल फुटबल सङ्घको आयोजनामा गत असोज २ गतेदेखि जारी लिगको विजेताले नगद रु १० लाख र उपविजेताले रु पाँच लाख पुरस्कार प्राप्त गर्नेछन् ।

यसैगरी उत्कृष्ट खेलाडी, गोलरक्षक, डिफेन्डर, प्रशिक्षक र उदीयमान खेलाडीले जनही रु २५ हजारका दरले पुरस्कार प्राप्त गर्ने आयोजकले जनाएको छ । लिगमा देशका सात प्रदेशका १० टिमको सहभागिता रहेको थियो । एन्फाले पहिलो पटक फुटसल लिग आयोजना गरेको हो ।