काठमाडौं, १२ भदौ । संघीय प्रणालीको खारेजीको उद्देश्यसहित प्रदीप वली (प्रशान्त) को अध्यक्षतामा ‘हामी नेपाली हाम्रो नेपाल’ पार्टी घोषणा गरिएको छ । आज (आइतबार) रिपोर्टर्स क्लब नेपालमा पत्रकार सम्मेलन गरेर नेपालको अस्तित्व र पहिचान कायम राख्ने उद्देश्यले पार्टीको स्थापना गरिएको जानकारी दिइएको हो ।

पार्टीको अध्यक्षमा वली, उपाध्यक्षमा अनिल पहाडी र प्रवक्तामा परशुराम खड्का चयन भएका छन् । काठमाडौंमा प्रमुख कार्यालय राखिएको नवगठित पार्टीको विद्यार्थी संगठन, युवा संगठन, महिला संगठन विभाग गरी तीन विभागसमेत गठन गरिएको हो ।

मौलिक राष्ट्रवाद, संघवादको अन्त्य वैज्ञानिक प्रजातान्त्रिक समाजवाद, उदारवादी अर्थतन्त्रलगायतका विचारधारा बोकेको पार्टीले वैज्ञानिक प्रजातान्त्रिक समाजवादलाई रणनीति बनाएको छ । त्यस्तै, संघवादको खारेजीलाई कार्यनीति बनाएको छ भने पार्टीले राष्ट्रवादलाई कार्यदिशाको रुपमा अघि सारेको छ ।

ऐलानी जमिनमा बसोबास गर्ने घरवारविहिन नेपालीलाई पारिवारिक संख्या अध्ययन गरी कट्टा रोपनी र विघाका आधारमा उनीहरुलाई नम्बरी जग्गा उपलब्ध गराउने पार्टीको प्रमुख उद्देश्य छ।

त्यस्तै, पार्टीले कालोबजारी, भ्रष्टाचारी र घोटाला सदाको लागि अन्त्य गर्नुपर्ने भन्दै देशमा बन्द भएका उत्पादनमूलक कलकारखानाहरु सञ्चालन गर्नुपर्नेमा जोड दिएको छ । देशभरका जिल्लामा सरकारी यायायात सञ्चालन गर्नुपर्ने भन्दै पार्टीले प्रत्येक विद्यालयमा टेक्नीकल प्राविधिक शिक्षा लागु गर्ने उद्देश्य लिएको छ।

प्रत्येक उमेर पुगेका महिलाहरुलाई स्यानिटाइजर प्याड तथा सुत्केरी सामाग्रीहरु निःशुल्क वितरण गर्ने र राज्य बैंक र वित्तिय संस्थाबाट प्रवाह गरिने हरेक ऋणको ब्याजदर सस्तो र सर्वसुलभ बनाउनुपर्नेमा पार्टीले जोड दिएको छ।

यसैगरी, देशमा भएका असमान तथा राष्ट्रघाती सन्धीहरु तत्काल खारेज गर्नुपर्ने पनि उसको माग छ । पार्टीले देशभर गरिब सहायता कोष खडा गर्नुपर्ने बताएको छ ।

पत्रकार सम्मेलनमा बोल्दै अध्यक्ष प्रदीप वलीले आफ्नो पार्टीले आफ्नो देशका जनताको हकहितमा, स्वाधिनताको पक्षमा काम गर्दै आएको बताए । उनले आफ्नो पार्टी देशको १२ जिल्लामा संगठन विस्तार भएको भन्दै अब देशभरि नै संगठन विस्तार गर्ने जानकारी दिए ।

उनले अहिले आफ्नो अध्ययन गर्ने उमेर भएपनि नेपालको राजनीतिक परिस्थितिले बाध्य भएर राजनीतिक रणमैदानमा उत्रिन परेको सुनाए । उनले भने,‘अब खिया लागेर मर्नै आँटेका बुढाहरुलाई स–सम्मान विदाइ गर्नुपर्छ । हामी युवाहरुले देशलाई सिंगापुर बनाउन सक्छौं।’

देशले जनताको समस्या बिर्सिएको भन्दै लाइन लागेर दैनिक विदेसिने युवाहरुलाई हेर्दा आफुलाई विरक्त लाग्ने उनको भनाइ थियो । देशले युवाहरुलाई स्वदेशमा नै राजगारीको व्यवस्था गर्नुपर्नेमा उनले जोड दिए ।

आज उच्च शैक्षिक योग्यता भएपनि सक्षम व्यक्तिले काम नपाउने अवस्था रहेको उल्लेख गर्दै उनले भने,‘पावरकै भरमा शिक्षा नभएकाहरुले पनि स्थान पाउँछन् तर, सक्षम युवा फालिएर निराश भएर विदेशिन बाध्य छन् ।’