सिद्धार्थनगर, १४ कात्तिक रासस : राष्ट्रपति विद्यादेवी भण्डारी आज लुम्बिनी आउने कार्यक्रम तय भएको छ । बुद्धजन्मस्थल लुम्बिनीमा उहाँले बज्रयान विहारको अवलोकन, मायादेवीमा पूजा तथा लुम्बिनी गुरुयोजनाका बारेमा जानकारी लिने कार्यक्रम तय भएको लुम्बिनी विकास कोषका उपाध्यक्ष भिक्षु मेत्तेयाले जानकारीदिनुभो ।

उहाँले भन्नुभयो, “महामहिम राष्ट्रपतिज्यू आज विहान लुम्बिनी आउने कार्यक्रम तय भएको छ । यहाँ उहाँलाई कोषको तर्फबाट लुम्बिनी गुरुयोजनाको हालसम्मको प्रगतिका बारेमा ‘ब्रिफिङ’ हुन्छ । उहाँले मायादेवी मन्दिरमा पूजाअर्चना तथा निरीक्षण गर्ने, बज्रयान महाविहार र नेपाल मण्डल स्वागतद्वारको निरीक्षण गर्ने, शान्तिद्वीपबाट मायादेवी मन्दिरसम्म पैदलयात्रा गर्ने एवं लुम्बिनी बौद्ध विश्वविद्यालयका बारेमा पनि जानकारी लिने कार्यक्रम रहेको छ ।”

कार्यक्रममा कार्यवाहक प्रधानमन्त्री एवं गृहमन्त्री बालकृष्ण खाँण र संस्कृति पर्यटन तथा नागरिक उड्डयनमन्त्री प्रेमबहादुर आलेसमेत सहभागी हुनुहुनेछ ।

शनिबार नै राष्ट्रियसभाका अध्यक्ष गणेश तिमिल्सना, पूर्वमन्त्री कृष्णगोपाल श्रेष्ठ, बागमती प्रदेशका सभामुख सानुकुमार श्रेष्ठ, बागमती प्रदेशका पूर्वमन्त्री अजयक्रान्ति शाक्य, सांसद नवराज सिलवाल, सूर्य पाठक, काठमाडौँ महानगरपालिका प्रमुख विद्यासुन्दर शाक्य, उपप्रमुख हरिप्रभा खड्की, विभिन्न मन्त्रालयका सचिव लुम्बिनीमा आइपुग्नुभएको कोषका सदस्यसचिव सानुराजा शाक्यले बताउनुभयो ।

उहाँका अनुसार लुम्बिनीको कार्यक्रम सकिएपछि राष्ट्रपतिद्वारा आज नै भैरहवास्थित गौतमबुद्ध अन्तर्राष्ट्रिय विमानस्थलमा हवाइट जेड बुद्धमूर्तिको अनावरण गर्ने कार्यक्रम छ ।सो बुद्धमूर्ति लुम्बिनी गार्डेन फाउण्डेशनको पहलमा बर्माबाट ल्याइएको हो । फाउण्डेशनको निमन्त्रणामा स्पेनको एक्सत्रेमादुरा प्रदेशका सभामुख बेलानका मार्टिन डेलगाडो, संस्कृतिमन्त्री नुरिया फलोरेश रेडोन्डोसहित प्रतिनिधिमण्डल पनि लुम्बिनीमा आइपुग्नुभएको छ । रुपन्देहीको सुरक्षा व्यवस्थालाई कडा बनाइएको प्रमुख जिल्ला अधिकारी श्रषिराम तिवारीले बताउनुभयो ।

यो पनि – ‘ब्लड क्यान्सर’पीडित बालकको उपचारार्थ रकम अभाव

खोटाङ, १४ कात्तिक (रासस) : वरिष्ठ पत्रकार उजुर राईले दिक्तेल रुपाकोट मझुवागढी नगरपालिका–१५ विजयखर्क निवासी छ वर्षीय ‘ब्लड क्यान्सर’पीडित पुरुषोत्तम कटुवाललाई रु १५ हजार सहयोग गर्नुभएको छ ।अर्थावस्था कमजोर रहेका ब्लड क्यान्सरपीडित कटुवालको पाँच महिनादेखि काठमाडौस्थित कान्ति बाल अस्पतालमा उपचार भइरहेको छ ।

बालकको उपचारमा आर्थिक समस्या भएको सामाजिक सञ्जालमा देखेपछि थोेरै भएपछि आर्थिक सहयोग गरेको पत्रकार राईले जानकारीदिनुभयो । सोही अवसरमा नेकपा (माओवादी केन्द्र)का स्थायी समिति सदस्य एवं अनुशासन विभाग प्रमुख टङ्क राईले नगद रु तीन हजार प्रदान गर्नुभएको छ । बालकको उपचारमा अहिलेसम्म रु साढे चार लाख खर्च भइसकेको बुवा लेखबहादुर कटुवालले बताउनुभयो । “छोराको उपचारका लागि अस्पतालले रु २५ लाख मागेको छ”, उहाँले भन्नुभयो, “आफूसँग एक पैसा छैन । नाबालक छोराको ज्यान बचाइदिन सबैसँग हात जोडेर अनुरोध गरिरहेको छु ।”

गत साउनदेखि उपचाररत बालकको उपचारमा यसअघि लागेको खर्च पनि ऋण काढेर गरिएको पीडित परिवारले बताएका छन् । काठमाडौँमै कोठा भाडामा लिएर उपचार गराइरहेको बालकलाई दैनिक परीक्षणमा अस्पताल पु¥याउनुपर्ने बाध्यता छ ।

२९० गणक छानिए

गणनाका लागि जिल्लामा २९० गणक छानिएका छन् । आगामी कात्तिक २५ देखि ९ मङ्सिर मसान्तसम्म जनगणना सञ्चालन हुँदैछ । दश स्थानीय तह रहेको जिल्लामा खटिने गणक छनोटदेखि नियुक्तिको प्रक्रिया पूरा गरिएको जिल्ला जनगणना कार्यालयका जनगणना अधिकारी जीतबहादुर कोइराला (जेबी)ले बताउनुभयो । “छनोट भएका गणकका लागि १३ कात्तिकदेखि १६ कात्तिकसम्म तालिम आयोजना गरिएको गरिएको छ”, उहाँले भन्नुभयो, “तालिम सकिएलगत्तै तोकिएको क्षेत्रमा पठाएर जनगणनाको काम सुरु गरिनेछ ।”

स्थानीय जनगणनाको कार्यालय कुभिन्डेअन्तर्गत खार्पा, स्थानीय जनगणनाको कार्यालय हलेसीअन्तर्गत दुर्छिम, स्थानीय जनगणनाको कार्यालय दिक्तेल र स्थानीय जनगणनाको कार्यालय खोटाङबजारमा गणकका लागि तालिमको आयोजना गरिएको जनाइएको छ । दुई नगरपालिका र आठ गाउँपालिका रहेको जिल्लामा गणनाअन्तर्गत करिब ४२ हजार घरपरिवार सूचीकरण भएको छ ।

गत ३० भदौदेखि १८ असोजसम्म जिल्लाका ती सबै स्थानीय तहमा कर्मचारी खटाएर घरपरिवार सूचीकरण गरिएको थियो । यस क्रममा सूचीकरणमा परेका तथा सूचीकरणमा छुट भएका घरपरिवारको मुख्य गणना हुने जनगणना उहाँले जानकारी दिनुभयो । विसं २०६८ को जनगणनाअनुसार जिल्लाको जनसङ्ख्या दुई लाख छ हजार ३१२ थियो भने विदेशमा बस्ने १७ हजार ६६२ थियो ।